የሳይንስና ቴክኖሎጂ ሚኒስቴርና ተጠሪ ተቋማት በ2010 በጀት ዓመት የመጀመሪያ ስድስት ወር የስራ አፈጻጸም እና በበጀት ዓመቱ ሁለተኛ ስድስት ወር ዕቅድ ዙሪያ ከየተቋማቱ የህዝብ ክንፍ አባላት ጋር ታህሳስ 26/2010 ዓ.ም ውይይት አካሄዱ፡፡
የሳይንስና ቴክኖሎጂ ሚኒስቴር ሚኒስትር ጌታሁን መኩሪያ (ዶ/ር ኢ/ር) የውይይት መድረኩን ሲከፍቱ በሳይንስና ቴክኖሎጂ ዘርፍ ሰፊ የህዝብ ክንፍ ንቅናቄ በመፍጠርና በቅንጅት በመስራት የሳይንስና ቴክኖሎጂ ሚኒስቴርና የተጠሪ ተቋማትን ተልዕኮ ማሳካት እንደሚገባ ገልጸዋል፡፡የሀገሪቱን ዕድገት ወደኋላ ከጎተቱት ምክንያቶች መካከል ስራን በጊዜና በፍጥነት አለመተግበር በዋናነት የሚጠቀሱ መሆኑን ገልጸው እንደ ሳይንስ ማህበረሰብ ችግሩን ለመፍታት ከህዝብ ክንፍ ጋር በቅንጅት ለመስራት እንቅስቃሴ መጀመሩንም ተናግረዋል፡፡
የበጀት ዓመቱን የመጀመሪያ ስድስት ወር የስራ አፈጻጸም እና የሁለተኛ ስድስት ወር ዕቅድን የተመለከተ የመወያያ ጽሁፍ ቀርቦ ውይይት ተደርጎበታል፡፡ 
በኢትዮጵያ አእምሯዊ ንብረት ጽ/ቤት ከተለዩ የህዝብ ክንፍ አካላት ጋር በቅንጅት ከተተገበሩ ተግባራት መካከል የሮያሊቲ ስርዓት ለመዘርጋት የሚያስችል የኢትዮጵያ የቅጅና ተዛማጅ መብቶች የጋራ አስተዳደር ማህበር መመስረትና ዕውቅና የመስጠት ስራ መሰራቱን በሪፖርቱ ተመልክቷል፡፡ የማህበሩን መመስረት ተከትሎ የተለያዩ የህግ ማዕቀፎች የማዘጋጀትና የጋራ አስተዳደር ማህበሩ የአገልግሎት ክፍያ አሰባሰብና አከፋፈልን ቀመር ማዘጋጀት እንዲችል ከአለም አእምሯዊ ንብረት ድርጅት ጋር በመተባበር ስልጠና መዘጋጀቱ ተገልጻል፡፡
በሳይንስ ዘርፍ የሚደራጁ የሙያ ማህበራትን በመለየት ከመመዝገብ፣ የህብረተሰቡን ህይወት የሚለውጡ ቴክኖሎጂዎችን ከማላመድ፣ የወጪ ምርቶችን ጥራት ለማሳደግ የምርምር ስራዎችን በቅንጅት ከመስራት፣ በኪነጥበብ ዘርፍ የሚደራጁ የጋራ ማህበራትን ከማደራጀት አንጻር ሚኒስቴር መስሪያ ቤቱ ትኩረት ሰጥቶ መስራት የሚገባው ተግባራት መሆናቸውን የተለያዩ የህዝብ ክንፍና ባለድርሻ አካላት የተለያዩ ጥያቄዎችንና አስተያየቶችን አቅርበዋል፡፡
ጌታሁን (ዶ/ር/ኢ/ር) በውይይቱ ማጠቃለያ በሀገሪቱ የሚገኙ የሙያ ማህበራት አመዘጋገብና እውቅና የመስጠት አሰራር ችግር ያለበት መሆኑን ጠቅሰው ይህንን ችግር ለመቅረፍ አዋጅ በመዘጋጀት ላይ መሆኑን ተናግረዋል፡፡ የሙያ ማህበራት ያሉባቸውን ችግሮች ለመለየትና በዘርፉ ያሉ ተግዳሮቶችን መቅረፍ እንዲቻል በተናጥል በሚኒስቴር መስሪያ ቤቱ እየተገኙ መወያየት እንዲቻል ፕሮግራም መመቻቸቱን አክለው ገልጸዋል፡፡ 
የውይይቱ ተሳታፊዎች ምቹ የስራ ከባቢ መፍጠር የቻሉትን የጥራት መሰረተ-ልማት ተቋማትን በመጎብኘት የፕሮግራሙ ፍጻሜ ሆኗል፡፡