News News

Back

በቅጅና ተዛማጅ መብቶች ጥበቃ አዋጆች ላይ ጅማ ከተማ ለሚገኙ ባለድርሻ አካላት የግንዛቤ ማስጨበጫ ስልጠና ተሰጠ

የኢትዮጵያ አእምሯዊ ንብረት ጽ/ቤት በጅማ ከተማ ለሚገኙ የህግ ባለሙያዎች፣ አርቲስቶች፣ የፖሊስ አባላት፣ የከተማዋ ባህልና ቱሪዝም ቢሮ ሃላፊዎችና ባለሙያዎች እንዲሁም ሌሎች ባለድርሻ አካላት በቅጅና ተዛማጅ መብቶች ጥበቃ አዋጆች ላይ ጥር 24/2010 ዓ.ም በላሎ ሆቴል ስልጠና ሰጠ፡፡

የቅጂ መብትና የማህበረሰቦች ዕውቀት ጥናት መረጃ ቡድን መሪ ያሲን ዑመር የአእምሯዊ ንብረት ምንነትን ሲገልጹ በተለያዩ ርእሰ ጉዳዮች ሃሳብ ብልጭ ያለለት ማንኛውም ሰው የፈጠረው ፈጠራ መሆኑን አውስተው ከማጀት አስከ አደባባይ እይታ የምንጠቀምባቸው እቃዎችና የተለያዩ  የማስዋቢያ ስእሎች አእምሯችን የፈጠራቸው ናቸው ብለዋል፡፡ የአእምሯዊ ንብረት  ወደ ተግባር ሊቀየር የሚችለው የማይጨበጥ ባህሪውን ወደ ሚጨበጥ መቀየር ስንችል እንደሆነ ገልጸው የአእምሯዊ ንብረት ጥበቃ ያስፈለገበትን ምክንያትና ጥበቃውን ስኬታማ ለማድረግ ከተሳታፊዎቹ የሚጠበቁትን በርካታ ሃላፊነቶች በዝርዝር አቅርበዋል፡፡

በመቀጠል በቅጅና ተዛማጅ መብቶች አዋጆች ላይ ስልጠናውን ያቀረቡት የቅጅ መብት ባለሙያ አዲሱ ስዩም  የቅጂ መብት ጥበቃ የሚያገኘው ቅርጽ እንጅ ሃሳብ አለመሆኑን በአጽንኦት ገልጸው  ይህ መብት ሲጠበቅ የሞራልና ኢኮኖሚያዊ መብቶች ሊያስገኝ እንደሚችል አስረድተዋል፡፡ አቶ አዲሱ ሥነ-ጽሁፍ፣ አንድ ሰው በአንድ ውስን ስብሰባ ላይ ያስተላለፈው ትምህርት፣  መንፈሳዊ ይዘት ያላቸው መልእክት አዘል ንግግሮች በድምጽ ከተቀረጹ የቅጂ መብት እንደሚኖራቸው ገልጸው ወጥነትና ግዙፍነት ለቅጂ መብት ስራዎች ምዝገባ መስፈርቶች እንደሆኑ አስረድተዋል፡፡  

የቅጅ መብትና የማህበረሰቦች ዕውቀት ህጋዊ ተፈጻሚነት ቡድን መሪ ወሰን ሙሉ ኪነ-ጥበብ በሙሉ ጊዜ መሰራት ያለበት ስራ መሆኑን ተናግረው የአገልግሎት ክፍያ መብት ማለት አንድ ጥበቃ የተደረገለት የቅጅ መብት ስራ በተደጋጋሚ ለንግድ አላማ ጥቅም ላይ ሲውል ባለመብቶቹ ክፍያ ሚያገኙበት አሰራር እንደሆነ ገልጸዋል፡፡ ለዚህም አሰራር እንዲመች ለትርፍ ያልቆመ  ሁለ ገብ የሆነ የጋራ አስተዳደር ማህበር ማቋቋሙንም አቶ ወሰን አስታውሰዋል፡፡

አንዳንድ የስልጠናው ተሳታፊዎች መድረኩ መዘጋጀቱ በአእምሯዊ ንብረት ጥበቃ ላይ ያላቸውን ግንዛቤ ከማሳደግ አንጻር እጅግ ጠቃሚ መሆኑን ገልጸው የቅጅና ተዛማጅ መብት ጥበቃ አተገባበርን የተመለከቱ ጥያቄዎችን ያነሱ ሲሆን በፅሁፍ አቅራቢዎቹ ምላሽ ተሰጥቷቸዋል፡፡